УКМК депутат Гүлкан Молдобекованын жардамчысы эмнеге кармалганын айтты

Жогорку Кеңештин депутаты Гүлкан Молдобекованын кеңешчиси Р.А. аттуу жаран алдамчылык жана расмий документтерди жасалмалоо фактысы боюнча кармалды. Бул тууралуу УКМК кабарлады.

Жүргүзүлгөн ыкчам издөө иш-чараларынын жыйынтыгында, Р.А. 2021-жылы Жогорку Кеңешке жумушка орношуу үчүн кайрылганда жасалма документтерди жана өзү жөнүндө жалган маалыматтарды берип, мыйзамсыз ишке орношуп, эмгек акы жана бонустук төлөмдөрдү алып жүргөндүгү аныкталган.

"Учурда өлкө бюджетине келтирилген жалпы зыян такталууда. Мындан тышкары кармалган жаран ортомчулук кызматын көрсөтүп, ар кандай маселелерди чечкени үчүн өлкөнүн жогорку жетекчилигинин атын жамынып, алдамчылык жолу менен жарандардын ири өлчөмдөгү акча каражаттарын алып турган", - деп билдиришти УКМКдан.

Жогорудагы кылмыштын белгилери боюнча кылмыш иши козголуп, учурда Р.А. тарабынан жасалган мыйзамсыз иштердин бардык эпизоддорун аныктоо боюнча тиешелүү тергөө иш-чаралары жүргүзүлүүдө.

12-сентябрда УКМК тарабынан Гүлкан Молдобекованын иш бөлмөсү тинтүүгө алынып жатканы кабарланган.

Автор: Азат Бейшенбеков