Жалал-Абадда мурдагы аким, тергөөчү жана журналист 200 миң доллар опузалоого шектелип кармалышты (видео)

Жалал-Абадда тоо-кен ишканасынан 200 миң доллар талап кылган кылмыштуу топтун мүчөлөрүнүн иши токтотулду. Бул тууралуу бүгүн, 13-сентябрда УКМКдан билдиришти.

Маалыматка ылайык, кылмышка шектүү И.Н. аттуу жаран 10 миң доллар өлчөмүндөгү акча каражатын опузалап алуу учурунда кармалды.

"ИИМдин мурдагы тергөөчүсү кармалган И.Н, Чаткал районунун экс-акими Т.А. жана "Азаттыктын" мурдагы журналисти Н.А. менен биргеликте узак убакыт бою Чаткал районунун аймагындагы тоо-кен иштерине тартылган чет элдик инвесторлордон 200 миң доллар өлчөмүндөгү акча каражатын опузалап, инвесторлорду коркутуп келишкен", - деп айтылат маалыматта.

Ошондой эле кармалгандар июль айында эки транш менен 60 миң доллар алып, калган сумманы опузалап алууну уланта беришкени аныкталган.

Аталган факты боюнча Кылмыш-жаза кодексинин 208-беренеси (Опузалоо) менен кылмыш иши козголуп, кармалгандар УКМКнын тергөө абагына киргизилди.

Учурда тергөө иштери жүрүп жатат.