Садыр Жапаровдон унаа алган өзбек машыктыруучусу билдирүү жасады

Өлкө башчы Садыр Жапаров бокс боюнча өзбекстандык машыктыруучу Акмаль Хасановго унаа белек кылган соң, ал жалпы кыргызстандыктарга жана өлкө башчысына социалдык баракчасы аркылуу ыраазычылык айтып, билдирүү калтырган.

"Мен Кыргызстандын, өзгөчө президент Садыр Жапаровдун көңүл бурганына ыраазымын. Париждеги Олимп оюндарынан келген медаль кыргыз боксунун ийгилигинин башаты болуп, келечек муунга чоң шык берет деп ишемен", - деп белгилеген өз билдирүүсүндө.

Буга чейин Париж шаарында өтүп жаткан Жайкы Олимпиада оюндарынын жарым финалына чыккан Мунарбек Сейитбек уулуна секундант болгон өзбекстандык машыктыруучунун видеосу тараган.

Бул видеодон кийин көпчүлүк кыргызстандыктар өзбекстандык машыктыруучуга ыраазычылык билдиришкен.

Автор: Замира Ниязбекова