Футзал: Тажикстандын тарыхый беттешинде 6 гол жаралды

Коңшу Өзбекстанда өтүп жаткан футзал боюнча Дүйнө чемпиондугунда Тажикстан курама командасы Марокко курамасы менен беттешти.

"Е" тайпасындагы оюн Ташкенттеги "Хумо Арена" стадионунда өтүп, 2:4 эсебинде Тажикстандын жеңилүүсү менен аяктады. Марокко курама командасынан голдорду Осман Бумезу (1-жана 29-мүнөттө), Соуфиан Чаррауи (37) жана Идрис Райс Эль Фенни (38) киргизди. Тажикстан курама командасынын курамында Самандар Ризомов (34) жана Файзали Сардоров (39) өзгөчөлөндү.

Муну менен Марокко курамасы тайпадагы алгачкы 3 упайын алды.

Белгилей кетсек, бул беттеш Тажикстандын курама командасы үчүн тарыхый болуп калды. Себеби коңшу өлкөнүн курамасы Дүйнө чемпиондугунда алгачкы ирет ойноп жатат.

Кийинки беттешин Тажикстан 19-сентябрда Португалияга каршы өткөрсө, ошол эле күнү Марокко Панама менен ойнойт.

Автор: Азат Бейшенбеков