Өлкөдө бир жумадагы кадрдык өзгөрүүлөр

Кыргызстанда бир жуманын ичинде (16-сентябрдан 20-сентябрга чейин) бир нече кадрдык өзгөрүүлөр орун алды.

Алсак, аптанын алгачкы күнү, 16-сентябрда Күрөш федерациясынын жаңы президенти болуп Эркин Тентишев шайланганы белгилүү болду. Тентишев буга чейин президенттин кеңешчиси болгон. Ал эми буга чейинки Күрөш федерациясынын президенти Мелис Турганбаев өз каалоосу менен арыз жазган болчу.

Ушул эле күнү Жусуп Баласагын атындагы Кыргыз улуттук университетинин ректору алмашты. Ага ылайык, Төлөбек Абдырахманов ээлеген кызматынан бошотулуп, анын ордуна Догдурбек Чонтоев ректор болду. Тиешелүү жарлыкка өлкө башчы Садыр Жапаров кол койгон.

16-сентябрда “Кыргыз Республикасынын Мамлекеттик өнүктүрүү банкы” ААКтын директорлор кеңеши Ильяр Иманходжаевди башкармалыктын төрагасынын орун басары кызматынан бошотуу жөнүндө чечим кабыл алган. Мекеме Иманходжаев өз каалоосу арыз жазганын белгилеген.

Министрлер кабинетинин башчысы Акылбек Жапаров кол койгон тескемеге ылайык, 20-сентябрда Маалыматтык чөйрөнү изилдөө борборунун директору болуп Бактыгүл Иманбек кызы дайындалды. Аталган борбор өлкөдө ушул жылдын август айында түзүлүп, Маданият министрлигине карайт.

Автор: Айжанар Рыспек кызы
Фото: Интернеттен алынды