Акылбек Жапаров ушул жылдын аягына чейин бардык үйлөрдү камсыздандырууну тапшырды

Министрлер кабинетинин төрагасы Акылбек Жапаров быйыл республиканын ар кайсы аймактарында болгон селдердин кесепеттерин жоюу боюнча кеңешме өткөрдү.

Өкмөттүн басма сөз кызматынан билдиргендей, анда учурдагы көйгөйлөр гана эмес, келечекте ушундай кырсыктарды болтурбоо боюнча узак мөөнөттүү стратегиялар да талкууланды.

Жыйында өзгөчө кырдаалдар министри Бообек Ажыкеевдин берген маалыматына караганда, Кыргызстанда 2024-жылдын сентябрына карата 331 сел катталып, анын кесепетинен 5 354 үй жабыркаган. Анын ичинен 102си бузулуп, 138и капиталдык оңдоого муктаж.

Жапаров тиешелүү мамлекеттик органдарга үстүбүздөгү жылдын аягына чейин бардык үйлөрдү, анын ичинде кооптуу зонада жайгашкан үйлөрдү камсыздандырууну тапшырды.

"Бул мындай жагдайлар кайталанган учурда жарандарды финансылык жактан коргоону камсыз кылат жана турак жайынан ажыраган үй-бүлөлөрдүн кесепеттерин азайтат. Камсыздандыруу адамдардын жаратылыш кырсыктарынан тезирээк сакайып кетишине жана мамлекеттик бюджеттин жүгүн азайтууга жардам берүүчү маанилүү курал болуп калат.

Өкмөт башчы жыл сайын глобалдык жылуулукка байланыштуу жаратылыш кырсыктарынын саны өсө турганын белгиледи. Ушуга байланыштуу кыймылсыз мүлктү камсыздандыруу калктын коопсуздугун жана табигый кырсыктардын кесепеттерине туруктуулугун камсыз кылуу үчүн зарыл чара болуп калат", - деп айтылат маалыматта.

Автор: Бек Оморбеков