Футзал: ФИФА Франциянын Иранга күмөндүү утулушун териштире баштады

Эл аралык футбол федерациясы (ФИФА) коңшу Өзбекстанда өтүп жаткан футзал боюнча Дүйнө чемпиондугунун тайпалык этабынын 3-турунун алкагында Франция менен Ирандын командаларынын беттешин иликтей баштады. Бул тууралуу чет элдик спорттук басылмалар жазып чыгышты.

Бул эки команданын оюнуна Ливия менен Парагвай арызданган. Бул командалардын арызында, Франция курамасы күчтүү командадан качуу үчүн, тагыраагы күчтүү делген Бразилия менен 1/8 финалда ойноп калбаш үчүн атайын утулуп бергени жазылган.

ФИФА бул арыздын негизинде териштирүүнү баштаган.

Бул жеңилүүдөн кийин Франция тайпада экинчи орунду ээлеп, 1/8 финалда Таиланд курамасы менен беттешет. Иран курамасы 1/8 финалда Мароккого каршы ойномой болду. Эгерде ирандыктар Мароккону жеңсе, чейрек финалда Бразилияга каршы ойнойт.

Автор: Азат Бейшенбеков