Апта ичинде өлкөдө орун алган кадрдык өзгөрүүлөр

Өлкөдө 23-сентябрдан 27-сентябрга чейин бир нече кадрдык өзгөрүүлөр орун алды. Аларды бир топтомдо тизмектейбиз.

24-сентябрда Акылбек Жапаров кол койгон тескемеге ылайык, Экономика жана коммерция министринин орун басары болуп Гүлшат Асылбаева дайындалды. Ал 2023-жылдын сентябрь айынан бери Монополияга каршы жөнгө салуу кызматынын төрайымы болуп иштеп келген.

Белгилей кетсек, Асылбаева 2015-жылы "Өнүгүү-Прогресс" партиясынын тизмеси боюнча VI чакырылыштагы Жогорку Кеңештин депутаты болгон.

Ушул эле күнү Монополияга каршы жөнгө салуу кызматынын төрагасынын милдети Женалы Орозбаевге жүктөлдү.

Апта ичинде Евразия экономикалык комиссиясынын Протокол жана уюштуруучулук камсыздоо департаментинин директору болуп Бакай Маканбаев дайындалды. Бул убакка чейин ал департаменттин протоколдук камсыздоо бөлүмүнүн башчысы болуп иштеген.

БШК 26-сентябрда №13 Сузак округу боюнча мөөнөтүнөн мурда өткөн шайлоонун жыйынтыгын чыгарып, Алтынбек Кылычбаев жеңүүчү деп табылды. Ал 10 миң 174 добуш топтоп, шайлоочулардын 48.32 пайыз добушун алган. Кылычбаев Тазабек Икрамовдун ордуна Жогорку Кеңештин депутаты болот.