Өлкөдө бүгүнтөн тарта пенсиянын көлөмү көбөйтүлөт

Бүгүн, 1-октябрда президент Садыр Жапаров Карылардын эл аралык күнү менен кыргызстандыктарды куттуктап жатып, бүгүнтөн тарта пенсиянын камсыздандыруу бөлүгү 18 пайызга жогорулаганын айтты.

"2024-жылдын 1-октябрынан тартып пенсиянын камсыздандыруу бөлүгү 18 пайызга жогорулап, эң минималдуу дегенде 1000 сомдон кем эмес суммага көбөйүп, минималдуу пенсия 6900 сомду түзөт", - деди өлкө башчысы.

Социалдык фонддун коомчулук жана ЖМК менен иш алып баруу башкармалыгынын башчысы Жеңишбек Мукамбетов Биринчи радиого маек берип жатып, Кыргызстанда 785 миңге жакын пенсионер бар экенин айткан.

Айтымында, быйылкы жылы январь айынан бери 30 миңден ашык жаран пенсияга чыкты.

"1-июлда социалдык камсыздандыруу мыйзамына өзгөртүүлөр киргизилип, мөнөөтүнөн мурда чегериле турган пенсиялар жокко чыгарылган. Тагыраагы, 55-60 жаштан 35-40 жылдык иш тажрыйбасы барлар эрте чыгып жүрүшкөн да. Ошол ченем жокко чыгарылып, азыркы учурда 58-63 жашта гана пенсияга чыгып жатышат. Андан тышкары бизде жеңилдик шартта пенсиялар бар. Алар өзгөрүүсүз калды.

1-июлдан баштап толук эмес базалык бөлүктү алып жүргөн жарандарга кайра эсептөө жүргүзүлдү. Пенсиянын орточо баасы 9 192 сомду түзөт", - деген ал.

Маалымат үчүн: Пенсияга чегерилген каражат эки бөлүмдөн турат.

Базалык (мамлекет тарабынан камсыздардырылган бөлүмү) (республикалык бюджеттен каржыланат)
Камсыздандыруу бөлүмү (Пенсиялык фонд тарабынан каржыланат).