Кыргызстандын футбол боюнча улуттук курамасы Жидда шаарында окуу-машыгуусун өткөрөт

Футбол боюнча Кыргызстандын улуттук курама командасы октябрдагы беттештерине даярдыгын көрө баштады. Бул туурасында бүгүн, 1-октябрда Кыргыз футбол биримдиги кабарлады.

Маалымдалгандай, 2026-жылы өтө турган Дүйнө чемпиондугуна тандоо оюндарынын үчүнчү раунду алкагында Кыргызстандын улуттук курама командасы 10-октябрда Катар менен конокто ойнойт. Ал эми 15-октябрда Түндүк Корея курамасы өз оюн талаасында кабыл алат.

"Жогоруда айтылган беттештерге даярдык көрүү максатында Максим Лисицындын жетекчилиги алдында курама команда 3-октябрдан тартып Сауд Арабиянын Жидда шаарында окуу-машыгуу жыйынын өткөрөт. Даярдык аяктагандан кийин команда биринчи беттешке катышуу үчүн 8-октябрда Катарга бет алат", - деп белгилеген маалыматта.

Ошондой эле чакырылган оюнчулардын курамы жакынкы күндөрү жарыялана тургандыгы маалыматта кошумчаланган.

Автор: Замира Ниязбекова