Ошто улгайгандардын күнүнө карата муктаж болгондорго жардам көрсөтүлдү

Бүгүн, 1-октябрда Ошто Улгайган адамдардын эл аралык күнүнө карата муктаж болгон карыларга ар тараптуу жардамдар көрсөтүлдү. Бул тууралуу Ош мэриясынан билдиришти.

Маалым болгондой, Ош мэриясынын өкүлдөрү "Боорукердик" үйүндө жашаган улгайган жарандарга жардам көрсөтүшүп, азык-түлүктөрдү жана белектерди тапшырышты.

Ал эми ОшМУнун медициналык факультетинин студенттери тарабынан акысыз медициналык кароо уюштурулду.

"Жалгыз бой, аз камсыз болгон жана социалдык жактан аялуу катмардан 230 улгайган жаранга майрамдык концерттик программа тартууланып, сый-тамак берилди", - деп айтылат маалыматта.

Белгилей кетсек, мындай иш-чаралар ден соолугунан мүмкүнчүлүгү чектелген, улгайган, жалгыз бой карыларга колдоо көрсөтүү максатында жыл сайын өткөрүлүп келет.