"300 миң сом байге". Тогуз-Тородогу Мойдунов мектеби жылдын мыктысы болду

Бүгүн, 1-октябрда Жалал-Абад облусунун Тогуз-Торо районундагы Т. Мойдунов атындагы жалпы орто билим берүү уюму “Жылдын мыкты мектеби – 2024” деп аталып, 300 миң сомдук сертификат менен сыйланды. Бул туурасында Билим берүү жана илим министрлигинин маалымат кызматы билдирди.

Маалымдалгандай, иш-чарага министр Догдуркүл Кендирбаева катышып, катышуучуларды куттуктады.

"Тандоого республиканын аймактарынан 122 мектеп катышты. Сиздерди бүткүл Кыргызстан тандады. Мен үчүн ар бир мектеп жеңүүчү”, – деди Д.Кендирбаева.

Ошондой эле министрлик тарабынан башка катышуучуларга ыраазычылык кат тапшырылды.

Мындан тышкары, демөөрчүлөр Жалал-Абад облусундагы Аксы районунун Сары-Челек аймагына караштуу №5 Асанбек Кабаев атындагы мектепке 600 миң сом берсе, башка бир демөөрчү 200 миң сомдук сертификат сыйлыгын берген.

Автор: Замира Ниязбекова