Төрага Шакиев: "Баяндамачылар тантырап отурса мыйзамын кабыл албайбыз"

Бүгүн, 3-октябрдагы Жогорку Кеңештин жыйынында төрага Нурланбек Шакиев Министрлер кабинетинин өкүлдөрүн мыйзам чыгарууда сапатына көңүл бурууга чакырды.

Ал мыйзам долбоорун тааныштырган баяндамачылардын даярдыгы начар болуп жатканына нааразы болду.

“Министрлер кабинети демилгелеген бардык мыйзам долбоорлорун Жогорку Кеңеш учур талабына, муктаждыкка байланыштуу колдоп келдик. Анын негизинде, мына президентибиз дагы айтып жатат, өлкөдө бир топ жылыштар болду. Бирок силер парламент жумшактык кылып бир топ мыйзамдарды талкуусуз кабыл алып берип жатканына көнүп алдыңыздар.

Эми мындан ары андай болбойт. Эгерде мыйзамдар чийки болсо, бул жакка келген баяндамачылар онтолоп, тантырап отурса мыйзамдар өтпөйт. Андыктан силер дагы Жогорку Кеңешке болгон мамилеңерди өзгөрткүлө. Парламент мындан кийин ар бир мыйзам долбоорун тыкыр карап, астейдил мамиле жасайт. Ошого көнгүлө!" - деди Шакиев.