"Айыл өкмөттү, мэрди шайлай албагандан кийин...". Жылкыбаев депутаттардын укугу тууралуу айтылган кептерге жооп берди

Борбордук шайлоо комиссиясынын мүчөсү Узарбек Жылкыбаев "Биринчи радиого" курган маегинде коомчулукта жергиликтүү кеңештин депуттаттарынын ыйгарым укуктары кыскарып жатат деген кептерге жооп берди.

Ал жергиликтүү кеңештин депутаттыгына аймактын социалдык маселесин чечүү үчүн барарын белгилеп, андыктан активдүү жарандарды айылынын өнүгүшүнө салым кошуу үчүн депутаттыкка талапкерлигин коюуга чакырды.

"Азыр жаштардын көбү "мурдагыдай айыл өкмөттү, мэрди шайлай албагандан кийин депутаттын кандай укугу бар" дешет. Жергиликтүү мунципалитеттин бюджетин бекиткен жергиликтүү кеңеш болот. Ошол бюджет аркылуу социалдык маселелер чечилет. Мисалы жергиликтүү кеңештин депутаты болуп туруп эле ар кандай проектерге, эл аралык уюмдарга кат жазып, айылынын, шаарынын көйгөйлөрүн чечкен депутаттар көп. Ошондуктан башчыны эле шайлаганда керек деген ойдон алыс болушубуз керек", - деди ал.

Автор: Кылымбек Бейшеев
Фото: Интернеттен алынды