Ошто оңдоп-түзөөдөн өткөн Акматбек Сүйүмбаев атындагы стадиондун ачылышы болду (сүрөт)

Бүгүн, 5-октябрда Оштогу толугу менен реконструкцияланган Акматбек Сүйүмбаев атындагы стадиондун салтанаттуу ачылыш аземи өттү. Бул тууралуу Кыргыз футбол бирикмесинен билдиришти.

Маалым болгондой, ачылыш азем Ош шаарынын 3024-жылдыгына арналып, ал калаа тургундары үчүн атайын шоу-программа менен коштолду.

"Аталган стадион 1961-жылы курулган жана алгачкы жолу толук оңдоп түзөөдөн өттү. Реконструкция алкагында стадиондо чатырлар орнотулуп, трибуналардын үстү жабылды. Ал эми оюн талаасы гибриддик болуп жаңыланып, автоматтык суугаруу системасы орнотулду", - деп айтылат маалыматта.

Белгилей кетсек, стадион эми бардык эл аралык талаптарга ылайыкталды. Жаңы орнотулган стадиондун заманбап жарыктаныруучу шам-чырактары, кечки маалда күйөрмандарга оюндарга күбө болуусуна шарт түзөт.

Ал эми стадиондогу жарыктандыруу системасынын, жана гибриддик оюн талаасыны орнолушу Кыргыз футбол биримдигинин күчү менен ишке ашты.