Футбол: Тажикстан Орусия менен ойноодон баш тартты

Коңшу Тажикстандын футбол федерациясы Орусия футбол биримдигинин ноябрда улуттук курама командалардын жолдоштук беттешин өткөрүү сунушунан баш тартты. Бул тууралуу кечээ, 7-октябрда Тажикстандын футбол федерациясы билдирген.

Буга себеп Тажикстан курамасынын белгиленген даталарда башка оюндар пландалганы болгон. Мындан улам Орусиянын сунушунан баш тартууга туура келген.

Белгилей кетсек, 7-октябрдан баштап 15-октябрга чейин Орусиянын футбол боюнча курама командасы машыгууларды өткөрөт. Ошол эле учурда улуттук курамага атаандаш табыла элек. Жолдоштук беттешти өткөрүү сунушу Пакистанга жөнөтүлгөн, бирок алар баш тартышкан. Учурда Орусия Сириядан жооп күтүп жатат.

Автор: Азат Бейшенбеков