Кыргызстандык гимнасттар эл аралык турнирде алдыңкы орундарды багындырышты

Кыргызстандык гимнасттар Сербиянын Белград шаарында өткөн эл аралык турнирде байгелүү орундарды багындырышты. Бул тууралуу бүгүн, 8-октябрда Дене тарбия жана спорт департаментинен кабарлашты.

Маалыматка ылайык, мелдеш 5-6-октябрь күндөрү өткөн. Ага 16 өлкөдөн келген 600 гимнаст катышкан.

Ал эми Кыргызстандын атынан турнирге Амалия Сейтбекова, Айым Токушова, Амира Мадали, Алтынай Чонбашева, Таисия Пономарева жана Алия Сыдыкбаева катышып, өнөрлөрүн көрсөтүшкөн.

"Алар эстетикалык топтук гимнастика боюнча күмүш медалды жеңип алышты. Ошондой эле Айым Токушова топ менен аткарган көнүгүүсүндө алтын медалга ээ болсо, сегиз жаштагы Арууке Абдырасакова буюмсуз көнүгүүдө коло медалды жеңип алды. Ал эми Таисия Пономарева жана Алия Сыдыкбаева "Мисс Шарм" жана "Мисс жылмаюу" наамдарына татыктуу болушту", - деп билдирди мекемеден.

Гимнасттар Академия Гимнастика, "Ынтымак" спорт мектебинин атынан чыгып, Кыргызстандын желегин желбиретишти.