Төрага Шакиев Министрлер кабинетин сынга алды

Бүгүн, 9-октябрдагы Жогорку Кеңештин жыйынында төрага Нурланбек Шакиев Министрлер кабинетинин мүчөлөрүн парламентке толук даярдыкта келүүсүн талап кылды.

“Айрым бейтартип адистердин айынан Жогорку Кеңеш менен Министрлер кабинетинин ортосунда жарака кетип, жагымсыз жагдайлар түзүлгөн учурлар жок эмес. Ишине жоопкерчиликсиз мамиле кылган ошондой кызматкерлерге Министрлер кабинетинин жетекчилери сөзсүз чара көрүшү керек. Эгер чара колдонулбаса, Жогорку Кеңеш тиешелүү иштерди алып барууга укуктуу”, – деди Шакиев.

Ошондой эле ал Министрлер кабинетинин мүчөлөрү парламентке өлкөдөгү көйгөйлөрдү жана аларды чечүү жолдорун ачык-айкын талкуулоо максатында чакырыларын эске салды.

“Жетекчилер өз тармактары боюнча тиешелүү маселелерге толук даярдыкта келиши керек. Мыйзам долбоорлору чийки даярдалып, баяндамачылар да суроолорго жооп бере албагандыктан өткөн жумада эки маселе күн тартибинен алынды, бир мыйзам долбоору өтпөй калды. Мындай жагдайлар кайталанбашы зарыл”, – деди төрага.

Автор: Бек Оморбеков