Орусиянын дагы бир шаарында мигранттардын иштөөсүнө чектөө киргизилмей болду

Орусиянын Омск облусунда келерки жылдан тарта жүргүнчүлөрдү ташуу, билим берүү, саламаттыкты сактоо, соода жана башка бир катар тармактарда мигранттардын иштөөсүнө тыюу салуу киргизилет. Бул тууралуу облус башчысы Виталий Хоценко социалдык тармактагы баракчасына жазды.

"Мен чет элдик жарандарды эмгек патенти менен жүргүнчүлөрдү ташуу, билим берүү, саламаттыкты сактоо, соода, дары-дармек жана азык-түлүк өндүрүү ошондой эле социалдык кызмат көрсөтүү тармагында ишке тартууга тыюу салган жарлыкка кол койдум. Бул 2025-жылдын 1-мартынан тарта күчүнө кирет", - деп жазды ал.

Белгилей кетсек, буга чейин Орусиянын ондон ашык облусунда мигранттарга такси кызматында иштөөгө тыюу салынган, анын ичинде Новосибирск, Тула, Калуга, Челябинск облустары, Камчатка, аннексияланган Крым жана Якутия бар.

Автор: Азат Бейшенбеков