Кыргызстандын чек арасынан мыйзамсыз өткөн казак жарандары кармалды

Кыргызстандын чек арасынан мыйзамсыз өткөн чет өлкөнүн жарандары кармалды. Бул тууралуу бүгүн, 16-октябрда Ички иштер министрлигинен билдиришти.

Маалыматка ылайык, бүгүн, 16-октябрда милиция кызматкерлери Кызыл-Кыя шаарында Т.К. жана З.К. аттуу эки жаранды кармашты.

Текшерүү учурунда алар 6-октябрдан 7-октябрга караган түнү Казакстандын Жамбыл облусунун Тараз шаарынан Кыргызстандын Талас облусуна чек араны бузуп, мыйзамсыз өтүшкөнү аныкталган.

"Аталган жарандар Казакстандын жарандары экени аныкталып, алардын бири өз өлкөсүндө тоноочулук фактысы менен кылмыш жообуна тартылып, бирок тергөөдөн качып кетүү максатында чек араны бузуп Кыргызстанга мыйзамсыз киргендиги такталган", - деп айтылат маалыматта.

Кармалган жарандар Улуттук коопсуздук мамлекеттик комитетинин кызматкерлерине өткөрүлүп берилди.