Депутат Сарыбашов Орусиядагы мигранттардын балдарын онлайн окутууну сунуштады

Бүгүн, 17-октябрдагы Жогорку Кеңештин жыйынында депутат Таалайбек Сарыбашов Орусияда эмгектенип жүргөн кыргызстандык жарандардын балдарын онлайн окутууну сунуштады.

Эл өкүлү Орусиянын мамлекеттик мектептери мигранттардын балдарын албай жатканын айтты.

"Курулушта, ар кандай жумуштарда иштеген мигранттардын жеке менчик мектептерге балдарын берүүгө мүмкүнчүлүгү жок. Биз жарандарыбызга колдоо көрсөтүшүбүз керек. Алар жыргаганынан барышкан жок. Билим берүү министри мигранттардын балдарын онлайн окута турган программа иштеп чыксын", - деди Сарыбашов.

Ошондой эле эл өкүлү көйгөйлүү маселе боюнча парламент Орусиянын Мамлекеттик Думасы менен сүйлөшүүлөргө барышы керектигин белгиледи.

Автор: Кылымбек Бейшеев
Фото: Интернеттен алынды