Кыргыз спортчулары таэквондо боюнча Азия мелдештеринде 67 алтын жеңип келди

Кыргызстандын таэквон-до ГТФ боюнча курама командасы Өзбекстанда өткөн Азия биринчилигинде жана Азия чемпионатында 67 алтын медаль жеңди. Бул туурасында бүгүн, 18-октябрда Дене тарбия жана спорт департаментинин маалымат кызматы билдирди.

Маалымдалгандай, улуттук курама команданын спортчулары Азия биринчилигинде жана Азия чемпиондугунда жалпысынан 126 медаль жеңишти. Алардын 67си алтын, 37си күмүш, 22си коло медаль.

Белгиленгендей, курама команда башкы машыктыруучулар Атай Иманаилев жана Аскар Сыдыкакпаров, машыктыруучулар Бексултан Эрнисов жана Жоомарт Темирбековдун жетекчилиги алдында мелдешке катышты.

Белгилей кетсек, мелдеш 6-10-октябрь күндөрү Ташкент шаарында өткөн. Ага Кыргызстандын атынан 78 спортчу катышкан.

Автор: Замира Ниязбекова