Казакстандагы 16 жаштагы баланын өлүмү: Талгар облусунун прокуратура кызматкерлери кызматтан алынды

Казакстандын Башкы прокурорунун 18-октябрдагы буйругу менен Алматы облусунун прокурорунун орун басары С.Бакиров жана Талгар районунун прокурору Э.Бекманов ээлеген кызматтарынан бошотулган. Бул тууралуу казак басылмалары жазышууда.

Маалыматка ылайык, алардын кызматтан бошотулуусуна кылмыш процессинин мыйзамдуулугун көзөмөлдөө ишинде олуттуу кемчиликтердин болушу негиз болгон.

Буга чейин, Казакстандын Талгар районунун акиминин аппарат жетекчиси Аслан Касымбаев ээлеген кызматынан бошотулуп, Талгар районунун акими Танат Айдарбеков жана анын орун басары Айбек Бидаев дисциплинардык жоопкерчиликке тартылган.

Эске салсак, 13 адамдан турган топ ичимдик үчүн талгарлык Шерзат Болотту сабап, бычактап кетишкен. Ал оорукананын жандандыруу бөлүмүндө каза тапкан.

Ошондой эле 12-октябрга караган түнү өспүрүмдүн үйүнөн өрт чыгып, имарат толугу менен күйүп кеткен.