Шакиев Германиянын элчиси Габриэла Геллилди кабыл алды

Бүгүн, 23-октябрда Жогорку Кеңештин төрагасы Нурланбек Шакиев Германиянын Кыргызстандагы элчиси Габриэла Геллилди кабыл алды. Бул тууралуу парламенттин басма сөз кызматынан билдирди.

Маалыматка ылайык, жолугушууда эки өлкө ортосундагы саясий-экономикалык, маданий-гуманитардык алакаларды арттыруу тууралуу сөз болуп, анын ичинен парламенттер аралык байланыштарды кеңейтүү маселелери талкууланды.

Элчи министрлер кабинетинин төрагасы Акылбек Жапаровдун Германияга болгон иш сапарынын алкагында өткөн кыргыз-немис бизнес-форумунун ийгиликтүү өткөнүн эске салды.

"Бул форум ишкерлер ортосундагы түз байланыштарды бекемдөөдө маанилүү кадам. Анын натыйжасында жакын арада Бавария жергесинен Кыргызстанга инвесторлордун чоң тобунун келиши күтүлүүдө", - деди ал.

Автор: Айпери Бакталбек кызы