Депутат Бекешев мопеддерге айдоочулук күбөлүк берүүнү караштырыш керектигин айтты

Бүгүн, 23-октябрдагы Жогорку Кеңештин жыйынында депутат Дастан Бекешев кыймылдаткычынын көлөмү 50 кубга жетпеген мопеддердин катышуусунда жол кырсыктары көп катталып жатканын айтты.

Жыйында ал мындай транспорт каражаттарына "айдоочулук күбөлүк алуу шартпы?" деген суроо узатты.

Ага "Унаа" мамлекеттик мекемесинин жетекчисинин орун басары Бактыбек Шералиев "берилбейт" деп жооп берди. Ошондой эле ал кыймылдаткычынын көлөмү 50 кубдан жогору болгон мотоциклдерди айдайм дегендерге 16 жаштан баштап "А" категориясындагы айдоочулук күбөлүк берилерин кошумчалады.

Эл өкүлү мопеддин айдоочулары дагы жоопкерчилик алуу үчүн аларга айдоочулук күбөлүк берүү каралышы керектигин белгиледи.

Шералиев бул боюнча Жол кыймылынын коопсуздугун камсыздоо башкы башкармалыгы менен биргеликте иштер жүргүзүлүп жатканын айтты.

Автор: Кылымбек Бейшеев
Фото: Интернеттен алынды