Дин комиссиясынын жетекчиси Сауд Арабиянын Кыргызстандагы элчиси менен жолугушту

Бүгүн, 25-октябрда Дин иштери боюнча мамлекеттик комиссиянын жетекчиси Азамат Юсупов Сауд Арабиянын Кыргызстандагы элчиси Ибрахим бин Ради Аль-Ради жана Медина шаарындагы Пайгамбар мечитинин имамы шейх Салах бин Мухаммад Аль-Будаир менен жолугушту.

Дин комиссиясынан билдиргендей, жолугушууда Юсупов Кыргызстандагы диний чөйрөдөгү мамлекеттик саясат, ислам жаатындагы диний уюмдарга токтолуп, Сауд Арабия тарабынан көрсөтүлгөн кайрымдуулук иштери жана ажылыкты уюштурууну жакшыртуу боюнча тыгыз кызматташуу болуп жаткандыгын белгиледи.

Ошондой эле тараптар эки өлкөнүн кызматташуусу жылдан-жылга өнүгүп бара жатканын жана мындан ары дагы жогорку деңгээлге жеткирип, кызматташууга даяр экендигин билдиришти.

Автор: Айпери Бакталбек кызы