Өлкөдө илим жана техника жаатындагы илимий эмгектерге сынак жарыяланды

Президентин администрациясы Билим берүү жана илим министрлиги тарабынан илим жана техника жаатындагы мамлекеттик сый акысын изденип алууга илимий эмгектерди 11-ноябрдан тартып 11-декабрга чейин кабыл алуу башталгандыгын жарыялайт.

Маалымдалгандай, кароого 2021-жылдын 1-январынан тартып 2024-жылдын 11-ноябрына чейинки мезгилде жарыяланган илим жана техника жаатындагы илимий иштердин материалдары кабыл алынат.

"Мамлекеттик тилдеги филология жана адабият таануу боюнча илимий эмгектерден тышкары мамлекеттик сый акыны изденип алууга көрсөтүлүүчү илимий эмгектер, автордун 3төн кем эмес статьясы Q3төн кем эмес квартилдеги жана Орусиянын илимий цитаталар индекси ядродогу (РИНЦ), “Scopus” жана “Web of Science” эл аралык маалыматтар базасында индексациялануучу таанылган эл аралык илимий басылмаларда жарыяланууга, ал эми техниканын жаңы түрлөрү, техника жаатындагы илимий иштердин материалдары жана технологиялары беш жылдан кем эмес, ал эми гуманитардык үч жылдан кем эмес өндүрүштө өздөштүрүлүүгө тийиш.

Эгерде илимий изилдөөнү аткаруу же иштеп чыгуу процессинде административдик же уюштуруучулук функцияларды гана жүзөгө ашырган, жоюлбаган соттуулугу бар адамды Мамлекеттик сый акыны изденип алууга көрсөтүүгө жол берилбейт. Мамлекеттик сый акыны изденүүчү талапкердин Билим берүү жана илим министрлигине кайрылуусу жана илимий эмгектерин тапшыруусу зарыл", - деп айтылат маалыматта.

Белгиленгендей, кошумча суроолор боюнча (0312) 55-77-64 телефон номерине байланышса болот.

Автор: Замира Ниязбекова