Ким Чен Ын орус армиясын колдоо боюнча буйрук берди

Түндүк Кореянын лидери Ким Чен Ын Украинадагы жаңжал башталгандан бери орус армиясына колдоо боюнча сөздөрдү айтып, буйруктарды берип келген. Бул тууралуу Түндүк Кореянын Тышкы иштер министри Цой Сон Хи орусиялык кесиптеши Сергей Лавров менен жолугушуу учурунда айтты.

"Украинадагы кырдаал башталгандан кийин эле урматтуу башчыбыз Ким Чен Ын "биз эч кимди карабай, ырааттуу жана күчтүү түрдө орус армиясын жана орус элин согушта колдоп, жардам берели" деп айткан", - деген Түндүк Кореянын министри.

Ошондой эле ал Ким Чен Ын кол алдындагыларга орус армиясына күчтүү колдоо көрсөтүү боюнча буйрук бергенин билдирген.

Эске салсак, ушул жылдын июнь айынын ортосунда Владимир Путиндин Пхеньянга болгон иш сапарынын алкагында Орусия менен Түндүк Кореянын ортосунда ар тараптуу стратегиялык өнөктөштүк келишимине кол коюлган. Путин кийинчерээк келишимде өз ара аскерий жардам көрсөтүү беренеси да бар экенин ырастаган. Орус лидери бул кызматташтык кандайча ишке ашарын Москва менен Пхеньян гана аныктай турганын билдирген.

Автор: Азат Бейшенбеков