Садыр Жапаров менен Австриянын канцлери сүйлөшүүлөрдү жүргүздү

Бүгүн, 25-ноябрда президент Садыр Жапаровдун Австрияга болгон расмий сапарынын алкагында Австриянын канцлери Карл Нехаммер менен сүйлөшүүлөрдү жүргүздү. Бул тууралуу президенттин маалымат кызматынан билдиришти.

Маалым болгондой, эң алгач мамлекет башчысы Ардактуу коноктордун китебине Австрия элине жакшы каалоо-тилектерин билдирип, эстеликке жазуу калтырды.

"Тараптар соода-экономикалык, инвестициялык өз ара аракеттенүү жана энергетика жана башка тармактарда биргелешкен долбоорлорду ишке ашыруу боюнча пикир алмашып, эки тараптуу кызматташтыктын актуалдуу маселелерин талкуулашты.

Сүйлөшүүнүн жүрүшүндө Федералдык Канцлер демократия, адам укуктарын урматтоо жана укук үстөмдүгү принциптерине негизделген эки тараптуу кызматташтыкты чыңдоого умтуларын ырастады", - деп айтылат маалыматта.

Садыр Жапаров өз кезегинде Кыргызстан менен Австриянын ортосундагы өз ара аракеттенүүнү мындан ары да кеңейтүү зарылдыгын айтып, түзүлгөн өнөктөштүк биргелешкен демилгелерди ишке ашыруу үчүн жакшы мүмкүнчүлүктөрдү түзүп жатканын белгиледи.