Садыр Жапаров Венадан түз Берлинге расмий сапар менен барды

Президент Садыр Жапаров расмий сапар менен Германияга барды. Бул туурасында мамлекет башчысынын маалымат кызматы билдирди.

Маалымдалгандай, мамлекет башчысынын борту Берлин шаарынын эл аралык аэропортуна конду. Учактан түшө беришинде килем төшөлүп, Ардак кароолдун ротасы тизилди.

Ал эми Садыр Жапаровду Германиянын Тышкы иштер министрлигинин протокол жетекчисинин орун басары Фолькер Тиммерман жана башка расмий адамдар тосуп алышты.

Белгиленгендей, расмий сапардын алкагында мамлекет башчысы Германиянын президенти Франк-Вальтер Штайнмайер жана Федералдык канцлер Олаф Шольц менен эки тараптуу сүйлөшүүлөрү пландаштырылган. Тараптар кыргыз-герман эки тараптуу кызматташтыгынын бүткүл комплексин жана аларды өнүктүрүү келечегин талкуулашат, ошондой эле аймактык жана эл аралык мүнөздөгү маселелер боюнча пикир алмашат.

Мындан тышкары Садыр Жапаров германиялык бизнес өкүлдөр менен жолугушуу өткөрөт.

Автор: Замира Ниязбекова