Интерполдун өкүлдөрү расмий иш сапары менен Кыргызстанга келишти

25-26-ноябрь күндөрү Интерполдун башкы катчылыгынын өкүлдөрү расмий иш сапары менен Кыргызстанга келишти. Бул туурасында ИИМдин басма сөз кызматы билдирди.

Маалымдалгандай, алар ИИМ жетекчилиги менен жолугушууларды өткөрүп, Интерполдун Улуттук борбордук кеңсесине, Кылмыш иликтөө башкы башкармалыгына жана ИИМдин Академиясына барып алардын ишмердүүлүгү менен таанышты.

Мындан тышкары алар кылмышкерлерди издөө жана экстрадициялоо менен алектенген укук коргоо органдарынын кызматкерлери үчүн атайын эки күндүк окуу семинарын өткөрүштү.

"Интерполго мүчө өлкөлөрдүн ортосундагы өз ара аракеттенүүнүн негиздери, эл аралык сот адилеттиги жана укук коргоо тармагындагы актуалдуу көйгөйлөрдү чечүү жолдору менен тажрыйба алмашууда тараптар мамилени чыңдоо керектигин баса белгилешти", - деп айтылат маалыматта.

Автор: Замира Ниязбекова