Садыр Жапаров Германиянын Федералдык канцлери Олаф Шольц менен жолукту

Бүгүн, 26-ноябрда президент Садыр Жапаров Берлин шаарына жасаган расмий сапарынын алкагында Германиянын Федералдык канцлери Олаф Шольц менен эки тараптуу сүйлөшүүлөрдү өткөрдү. Бул тууралуу президенттин маалымат кызматынан билдиришти.

Анда кыргыз-герман жана глобалдык күн тартибинин актуалдуу маселелери талкууланды.

Канцлер Олаф Шольц кыргыз-герман мамилелеринин өнүгүү динамикасына жогору баа берди. Ал Германия Кыргызстан менен бардык багыттар боюнча, анын ичинде эки өлкө үчүн артыкчылыктуу тармактарда өз ара пайдалуу долбоорлорду ишке ашыруу боюнча конструктивдүү кызматташтыкты мындан ары өнүктүрүүгө даярдыгын билдирди.

Ал эми президент Садыр Жапаров кыргыз-герман кызматташтыгын мындан ары бекемдөөнүн маанилүүлүгүн белгиледи.

“Азыр биздин өлкөгө германиялык бизнес тарабынан бир кыйла кызыгуу байкалып жатканына кубанычтабыз. Биз германиялык бизнестин биздин экономикабызга катышуусун кубаттайбыз”, - деди Садыр Жапаров.

Ошондой эле мамлекет башчысы гидроэнергетика, транспорт жана логистика сыяктуу кызматташуунун артыкчылыктуу тармактарын айтып өттү. Ал Кыргызстан Германия менен, ошондой эле бүтүндөй Европа Биримдигинин өлкөлөрү менен экономикалык кызматташтыкка ачык экендигин баса белгиледи.