Германияда абакта күнөөсүз 13 жыл отурган адам 750 миң евро компенсация талап кылууда

Германиянын Бавария провинциясында адам өлтүрүүгө айыпталып, 13 жыл абакта отурган немис жараны Манфред Гендицки акталгандан кийин моралдык зыян үчүн компенсация төлөп берүүнү талап кылууда. Ал бул үчүн 750 миң евро сураган. Бул тууралуу Spiegel журналынын жазганына таянып чет элдик басыламалар билдирүүдө.

Журнал жергиликтүү прокуратура Гендицкиге абакта отурган 4916 күнүнүн ар бири үчүн 75 евродон жалпы 368 миң евродон ашык компенсация төлөгөнүн, бирок ал бул суммага канааттанбаганын жазган. Анда акталган адам төлөм бардык чыгымды жаппаганын мисал кылган.

Маалымдалгандай, ал адам сот системасы менен көп жылдар бою күрөшүп, ишти кайра кароону талап кылып, акыры жеңишке жеткен. Эксперттер Гендицки өлтүрдү деген аял кокустуктан каза болгонун далилдешкен.

Басылма 2010-жылы сот аны киши өлтүргөн деген айып менен өмүр бою эркинен ажыратканын, каза болгон аял ал жашаган үйдүн ээси болгонун кошумчалаган.

Автор: Кылымбек Бейшеев
Фото: Иллюстрациялык сүрөт