Кыргызстан менен Кытай логистика жана транс чек ара соодасында кызматташат

Кытайда Кыргызстандын делегациясы менен Янтянь Эл аралык контейнер терминалынын президентинин ортосунда жолугушуу болуп өттү. Бул тууралуу бүгүн, 27-ноябрда Санариптик өнүктүрүү министрлигинен билдиришти.

Жолугушууда Кытай, Кыргызстан жана Өзбекстанды байланыштырган логистикалык маршруттардын жана инфраструктуранын өнүктүрүлүшү, жүк ташууну жакшыртууга багытталган жаңы транспорттук коридорлор жөнүндө сөз болду.

Ошондой эле Кыргызстанда инфратүзүмдү модернизациялоо жана жаңы транспорттук хабдарды түзүү менен жүк ташуунун натыйжалуулугун арттыруу боюнча өзгөчө көңүл бурулду.

"Янтянь порту Борбордук Азиядан эл аралык рынокторго товарларды экспорттоо боюнча дүйнөлүк соодадагы маанилүү ролун улантууда", - деп айтылат маалыматта.

Эки өлкөнүн кызматташтыгы активдүү өнүгүп, соода жана логистика үчүн жаңы мүмкүнчүлүктөрдү ачууда.