Дагы бир өлкө Нетаньяхуну Гаагадагы соттун ордери боюнча камакка алуудан баш тартты

Израилдин премьер-министри Биньямин Нетаньяху Эл аралык кылмыш сотунун буйругуна карабастан, Франциянын аймагына келсе кармалбайт. Мындай билдирүүнү кечээ, 27-ноябрда Франциянын Тышкы иштер министрлиги таратты.

Француз министрлиги Рим статуту боюнча өз милдеттенмелерин аткарарын, бирок Нетаньяху жана башка министрлер кол тийбестикке ээ экендигин билдирген. Эгерде сот аны камакка алуу жана экстрадициялоо өтүнүчү менен кайрылса, бул эске алынат.

Франциянын ТИМи израилдик саясатчы Рим статутун ратификациялабаган мамлекет башчысы катары кол тийбестикке ээ экенин баса белгиледи.

Эске салсак, 21-ноябрда Гаагадагы Эл аралык кылмыш соту Израилдин премьер-министри Биньямин Нетаньяху, мурдагы коргоо министри Йоав Галант жана башкаларды камакка алууга ордер берди. Сот Израилдин жетекчилигин Палестина аймактарында согуш кылмыштарын жасаган, анын ичинде ачарчылыкты курал катары колдонгон деп айыптады.

Автор: Азат Бейшенбеков