"Эч ким үйсүз калбайт". Ташиев УКМКнын ар бир кызматкерине убада берди

2025-жылдын күз айына чейин Улуттук коопсуздук мамлекеттик комитетинин ар бир кызматкери турак жай менен камсыз болот. Бул тууралуу кечээ, 28-ноябрда УКМКнын төрагасы Камчыбек Ташиев УКМКнын Биринчи май жана Свердлов райондук бөлүмдөрүнүн жаңы имаратынын ачылышында билдирди.

Ал өлкөнүн бардык аймактарында УКМКнын жаңы имараттары салынып жатканын, бул өз кезегинде кызматкерлердин иштөөсүнө шарт түзүп берерин белгиледи.

"Айлыктар көтөрүлдү. Көпчүлүк кызматкерлер мамлекет тарабынан үй менен камсыз болду. Калгандары жакын арады үйлүү болот. Эмдиги жылы күз айына чейин бардык кызматкерлер 100 пайыз үй менен камсыз болот. Эч ким үйсүз калбайт", - деди Ташиев.

УКМК жетекчиси мамлекет аларга кам көрүп жатканын айтып, андыктан кызматкерлерди адилеттүү, так иш алып барууга чакырды.