ӨКМ Жумгалда жоголгон баланы издөө иши тууралуу маалымат берди

Жумгал районундагы Өрнөк айылында мал кайтарууга жайлоого кетип, дайынсыз болгон 9 жаштагы баланы издөө иши пассивдүү фазада улантылып жатат. Бул тууралуу бүгүн, 29-ноябрда Өзгөчө кырдаалдар министрлигинен билдиришти.

"Издөө иштеринин активдүү фазасы токтогон. Азыр пассивдүү фазада (бир аптада 1 же 2 жолу) жүрүп жатат. Бул жуманын башында төрт куткаруучу издөө иштерине тартылган. Келерки аптада дагы чыгышат", - деп билдиришти мекемеден.

Белгилей кетсек, кечээ, 28-ноябрдагы Жогорку Кеңештин жыйынында депутат Таалайбек Сарыбашов Өрнөк айылында жоголгон баланы издөө иштерин жандантуу керектигин айткан.

Эске салсак, 6-октябрда Жумгалдын Өрнөк айылында 49 жаштагы Болот Карыпбеков 9 жаштагы уулу менен мал кайтарганы кетип, дайынсыз жоголгон. Алардын аты Көкөмерен дарыясынан табылып, кайтарып жаткан малы чачырап кеткени белгилүү болгон. Дайынсыз жоголгондорду издөө иштери 19-октябрда башталган.

14-ноябрда ИИМ Көкөмерен суусунун боюнан 45 жаштагы жарандын жансыз денеси табылганын билдирген.

Автор: Айжанар Рыспек кызы