"Бир нече айдоочулар иштен алынды". Бишкек мэри коомдук транспорттун айдоочулары менен жыйын өткөрдү (видео)

Бишкек шаарынын мэри 24 автобустун айдоочусун бир нече жолу эреже бузгандыгы үчүн иштен алуу буйругун чыгарды. Ал эми транспорт бөлүмүнүн эки кызматкери ээлеген кызматынан бошотулду.

Бүгүн, 29-ноябрда Транспорт департаментинде жыйын болуп, анда Айбек Жунушалиевге 10 ай ичинде автобустардын катышуусунда 329 жол кырсыгы катталганы айтылды. 169 учурда коомдук транспорттун айдоочулары күнөөлүү болсо, 160ы экинчи тарап күнөөлүү.

Жыйынтыгында жол кыймылынын коопсуздугун камсыздоо бөлүмүнүн жана мэриянын транспорт башкармалыгынын бешинчи колоннасынын жетекчилери кызматтан алынды.

Ошондой эле мэр директордун орун басарына жана бир катар башкармалыктын кызматкерлерине, бардык бригадирлерге, көзөмөл механиктерге, колонналардын слесарларына сөгүш жарыялады.

Ишкананын бөлүмдөрүнүн жетекчилеринин бири катуу сөгүш алды.