Өзбекстан станцияларды жана поезддерди жеке колго өткөрүүгө уруксат берди

Өзбекстанда темир жолго тиешелүү объекттерди жана жер участокторун, анын ичинде станцияларды жана кыймылдуу курамды модернизациялоо жана куруу үчүн ишкерлерге берүүгө уруксат берилет. Бул тууралуу өзбек басылмалары жазышууда.

Мындай норма Өзбекстандын президенти Шавкат Мирзиёев 27-ноябрда кол койгон “Темир жол транспорту жөнүндө” мыйзамда камтылган.

Объекттер концессия же МЖӨ келишиминин мөөнөтүнө ижарага, менчикке же пайдаланууга берилиши мүмкүн.

Жалпы пайдалануудагы эмес темир жолдордун ээлери вагондорду жана контейнерлерди өткөрүү, токтотуу, жеткирүү жана алып чыгуу боюнча акы төлөнүүчү кызматтарды көрсөтүүгө, ошондой эле жүк менен операцияларды жүргүзүүгө укуктуу. Бул учурда тарифтер атаандаштык мыйзамынын алкагында жөнгө салынат.

Учурда темир жол транспортунун инфраструктурасынын ээлери болуп 40тан ашык министрликтер жана ведомстволор, алардын ишканалары, ошондой эле бул тармакта иштеген ишкерлер саналат.

Мыйзамда ошондой эле ташуучу операторлор жана жүргүнчүлөрдү ташыгандар рыноктук принциптердин негизинде өз кызматтарына бааларды өз алдынча белгилей ала тургандыгы белгиленген. Кадимки коомдук поезддердин тарифтерин мамлекет көзөмөлдөөнү улантат.