Бишкекте абактын алдына чогулгандарды тартып жаткан журналисттерди милиция кармап кетти (видео)

Бүгүн, 23-декабрда Бишкектеги №1 тергөө абагынын алдына чогулган камактагылардын жакындарын тартып жаткан “Азаттыктын” кабарчысы Максат Кутманбеков менен оператору Нурлан Бейшебаевди милиция кызматкерлери Бишкектин Октябрь ички иштер бөлүмүнө алып кетти. Бул тууралуу "Азаттык" сайты жазды.

Андагы маалыматка караганда, журналисттер чогулган адамдардын биринен интервью алган. Милиция кызматкерлери тартылган видеону берүүнү талап кылып, андан соң милиция бөлүмүнө алып кеткен.

Бишкек шаардык ички иштер башкармалыгы бул тууралуу азырынча комментарий бере элек.

Буга чейин бир катар ЖМКлар ЖАКтын жетекчиси алмашканына каршылык иретинде абакта камалган адамдар ачкачылык жарыялаганын жазышкан. Бирок Жаза аткаруу кызматы ал маалыматты төгүндөгөн.