Билим берүү жана илим министрлигинин маалыматына ылайык, өлкөдө жалпы республикалык тестке каттоо 3-февралда башталган, ал 4-апрелге чейин созулат. Ал эми тест болжол менен 15-майдан 21-майга чейин өткөрүлөт.
ЖРТга кимдер катыша алат?
- Ага 11-класстын окуучулары, кесиптик орто окуу жайынын же орто кесиптик окуу жайынын бүтүрүүчүлөрү, жогорку билими жоктор жана учурда ЖОЖдо билим албаган бүтүрүүчүлөр;
- Жогорку кесиптик билими бар жарандар ЖОЖдун күндүзгү, күндүзгү-сырттан, аралыктан окутуу формаларында жана экстернат формасында окуу тыюу салынган багыттар жана адистиктер боюнча контракттын негизинде окутуунун күндүзгү формасынын толук курсуна тапшыруу шарты менен тестке катышууга укуктуу.
- Кыргыз жарандары же билим берүү тармагында кызматташтык боюнча эл аралык келишимдин негизинде Кыргызстандын гранты боюнча билим алууга умтулган Казакстандын, Орусиянын, Белорусиянын жана Тажикстандын жарандары. Башка өлкөлөрдүн орто билими бар жарандары өлкөдөгү ЖОЖдун контракттык орундарына конкурска катышуу үчүн ЖРТга катыша алышат.
Каттоодон өтүү үчүн керектелүүчү документтер:
- паспорт (же паспорт ала элек болсо, туулгандыгы тууралуу күбөлүк);
- орто билим жөнүндөгү аттестат (мурдагы жылдардын бүтүрүүчүлөрү үчүн);
- ЖРТга каттоо акысын төлөгөндүгүн тастыктаган дүмүрчөк (квитанция);
- талаптарга ылайык келген электрондук сүрөт.
Каттоо акысы:
- Негизги тесттин акысы – 470 сом,
- Мамлекеттик тил боюнча тесттин акысы – 200 сом,
- Ар бир предметтик (ангис тили, химия, биология, физика, математика, тарых, кыргыз тили жана адабияты, орус тили жана адабияты) тесттин акысы — 470 сом.
Маанилүү: Предметтик тест негизги тесттен өзүнчө бааланат. Негизги тестти тапшырбастан, предметтик тестти тапшырууга болбойт.
Каттоо кайда жүргүзүлөт?
Каттоо Билимди баалоо жана окутуу усулдары борборунун электрондук платформасында жүргүзүлөт.
Онлайн каттоо үчүн эмнелер керектелет?
- уюлдук телефонуңуздун номери;
- паспортуңуздун оригиналынын электрондук сүрөттөрү (эки тарабы тең);
- Сиздин жүзүңүздүн электрондук сүрөтү (сүрөткө коюлган талаптар менен онлайн каттоо баракчасын толтуруу учурунда таанышасыз);
- Каттоо учурунда белгиленген телефонуңуздун номери мындан ары каттоо үчүн гана логин катары колдонулбастан, ЖОЖдорго тапшыруудагы конкурска катышуу үчүн да керектелет;
- Каттоонун онлайн бланкын толтуруу нускамасын сиз окуган жердеги ЖРТ боюнча жооптуу кызматкерден аласыз.
Негизги тесттин түзүлүшү:
- «Математика»
- «Сөздүк-логикалык тест»
- «Окшоштуктар»
- «Сүйлөмдөрдү толуктоо»
- «Окуу жана түшүнүү»
- «Эне тилинин практикалык грамматикасы»
Билим берүү министрлинин буйругуна ылайык 2024-жылдан тартып өлкө ЖОЖдоруна тапшырган абитуриенттер үчүн мамлекеттик тил боюнча тест милдеттүү болуп саналат. Бул тесттин жыйынтыктары ЖОЖдорго кабыл алууда таасир этпейт. Бирок негизги жана предметтик тесттердин жыйынтыктары (ЖРТ сертификаты), мамлекеттик тил боюнча тест тапшырылмайынча берилбейт.
ЖРТга кимдер катыша албайт?
Өздүгүн тастыктаган документи же ЖРТга каттоосу жок абитуриенттер текстке киргизилбейт. Мектептин 11-классынын (колледждин, техникумдун бүтүрүүчү курсунун) окуучусу 16 жашка толо элек болсо, анын өздүгүн ырастоочу документ катары мектептен берилген окуучунун сүрөтү бар маалым каттын түп нускасы жана анын электрондук сүрөтү кабыл алынат. Анда окуучу аты, фамилиясы, атасынын аты, мектептин аталышы 11-классынын (колледждин, техникумдун бүтүрүүчү курсунун) окуучусу экендиги жазылышы керек.
Маалым катта анын берилген күнү көрсөтүлүп, мектептин (колледждин, техникумдун) директорунун колу коюлушу керек. Окуучунун сүрөтү мектептин (колледждин, техникумдун) мөөрү менен ырасталышы керек. Мыдан тышкары каттоо акысы төлөнбөгөн учурда ЖРТга катышуу мүмкүн эмес.
Маанилүү: Кыргызстандын чегинен сырткары жашаган жарандар тестке бир күн калганда каттоодон өтүүлөрү зарыл. Жогоруда белгиленген керектүү документтердин баарынын болушу керек.
ЖРТга онлайн каттоо боюнча төмөнкү номерлерге кайрылса болот: (0312) 66-48-38, (0500) 66-48-38, (0550) 66-48-38, (0222) 66-48-38.
Жалпы республикалык тест – бул Кыргызстанда мектеп бүтүрүүчүлөрдүн билим деңгээлин жана жөндөмдөрүн баалоо үчүн өткөрүлгөн экзамен. ЖРТ жыйынтыктары менен бүтүрүүчү өлкөнүн жогорку окуу жайларына тапшыра алат. Бул тестирлөө 2002-жылдан баштап Билим берүү жана илим министрлигине караштуу Билим берүүнү баалоо жана окутуу ыкмалары борбору тарабынан өткөрүлөт.
