Кыргыз-тажик өкмөттөр аралык кеңеши түзүлөт

Кыргыз-тажик өкмөттөр аралык кеңеши түзүлөрүн Садыр Жапаров кечээ, 13-мартта Бишкекте Тажикстандын президенти Эмомали Рахмон менен болгон сүйлөшүүлөрдүн жыйынтыгы боюнча жалпыга маалымдоо каражаттары үчүн билдирүү жасаганда айтты.

Мамлекет башчысы кыргыз-тажик чек арасы боордош эки өлкө менен элдин түбөлүк достугунун чек арасы болуп кала берерин белгиледи.

"Биз саясий, соода-экономикалык, инвестициялык, илимий-техникалык, маданий-гуманитардык жана башка чөйрөлөрдө өз ара аракеттенүүнү ырааттуу өнүктүрүү үчүн комплекстүү чаралар көрүлөрүн ырастайбыз. Бул максаттарда Мамлекеттер аралык координациялык кеңештин, эки өлкөнүн Кыргыз-тажик мамлекеттик чек арасын делимитациялоо жана демаркациялоо боюнча өкмөттүк делегацияларынын жана Тышкы иштер министрлер кеңешинин потенциалы толук өлчөмдө пайдаланылат.

Биз эки тараптуу кызматташтык маселелерин комплекстүү кароо боюнча Өкмөттөр аралык комиссияны Кыргыз-тажик өкмөттөр аралык кеңеши деп кайра түзүү чечимин кабыл алдык, аны Министрлер кабинетинин төрагасы жана Тажикстандын премьер-министри жетектейт", - деди Жапаров.

Автор: Бек Оморбеков
Фото: Президенттин басма сөз кызматы