Израилде Иран менен болгон кагылыштан курман болгондордун саны өстү

Израилде Ирандын аткылоосунан 28 адам набыт болгонун Израилдин премьер-министринин кеңсесинин кеңешчиси Дмитрий Гэндельман билдирди.

"Операция башталгандан бери 28 адам каза тапса, 1 472 адам жарадар болду",- деп жазды ал 24-июнда Telegram каналында.

Анын айтымында, жабыркагандардын 15инин абалы оор, 58инин абалы орто. Ал эми калган 1 399 жаран жеңил жаракат алган.

13-июндан бери Иран Израилге 550дөй ракета жана 1000ден ашуун учкучсуз учактарды учурганы такталган.

23-июнда Гендельман каза болгондордун саны 25 адамга жеткенин кабарлаган болчу.

Айта кетсек, 24-июнда АКШ президенти Дональд Трамп Израил менен Ирандын ортосунда ок атышууну толук токтотуу боюнча келишим түзүлгөнүн жарыялаган.

Автор: Кылымбек Бейшеев
Фото: Интернеттен алынды