Чехияда ысык аба ырайына байланыштуу ок-дары кампасында өрт чыкты

Чехияда ысыктан улам ок-дары сакталган кампада өрт чыкты. Бул тууралуу чет элдик басылмалар жазышууда.

Маалым болгондой, өрт Чехиянын түндүк-батышындагы Литомержице шаарынын аймагында башталган. CTK маалымат агенттиги кабарлагандай, өрттү өчүрүүдө 12 өрт өчүрүү бөлүмү жана авиация колдонулуп жатат. Төрт гектар аянттагы жер өрттөнгөн. Жер астындагы эски ок-дарылар жарылгандыктан кырдаал оор болууда. Окуяга жакын жайгашкан аймактардын тургундарына токойго кирүүдөн алыс болуу сунушталууда.

Чехияда күндүн ысыктыгы күчөп жатат. Республика боюнча көпчүлүк аймактарда температура +35 градустан жогору көтөрүлүүдө. Метеорологдордун божомолу боюнча бейшемби күнү да аба +40 градуска чейин ысып калышы мүмкүн. Мындан тышкары, токой өрттөрүнүн коркунучу да өсүүдө.

Эске салсак, Европада катуу ысык аба ырайы күтүлүүдө. Испанияда аптаптан улам каза болгондор катталып жатканы айтылууда.

Автор: Ширин Марат кызы