"Орусиянын жарандыгын алган". Зеленский православ чиркөөсүнүн башчысын жарандыгынан ажыратты

Украина президенти Владимир Зеленский Украин православ чиркөөсүнүн митрополити Онуфрийди (дүйнөлүк аты — Орест Березовский) Украинанын жарандыгынан ажыратты. Бул тууралуу Украинанын Коопсуздук кызматы кабарлады.

Маалым болгондой, Березовский 2002-жылы Орусиянын жарандыгын алып, бирок бул тууралуу украин бийлигине билдирген эмес жана ошол эле маалда Украинанын жараны катары статусун пайдаланып жүргөн.

Мекеме билдиргендей, Березовский Москва патриархаты менен байланышта болуп, Украин чиркөөсүнүн канондук көз карандысыздык алышына тоскоолдук кылган.

Митрополит Клименттин айтымында, митрополит Онуфрийдин украин паспортунан башка документи жок жана ал башка өлкөлөрдөн жарандык алуу үчүн кайрылган эмес. Анын айтымында, Онуфрий өзүнүн укуктарын Украина жараны катары коргойт.

Орусиянын Украинага кол салуусунан кийин, Украин православ чиркөөсү Москва патриархатынан толук көз карандысыз экенин жарыялаган, бирок байланышы толук үзүлгөн эмес. Айрым храмдар Православдык чиркөөгө өткөрүлүп берилсе, айрым дин кызматкерлери орусиялык пропаганданы таратуу боюнча шектелип, кылмыш иштери ачылган.

Автор: Ширин Марат кызы