Израилдин армиясы Сириянын түштүгүндөгү Сувейда шаарынын аймагында Сириянын куралдуу күчтөрүнө таандык аскердик техникаларга сокку урууда. Бул тууралуу бүгүн, 15-июлда Израил армиясынын басма сөз кызматы маалымдаганын чет элдик басылмалар жазышууда.
Израилдин бийлиги бул кадамды Сириянын куралдуу күчтөрүнүн Сувейдадагы друз шаардык жамаатына каршы аракеттерине жооп катары мүнөздөдү. Израилдин Аба күчтөрү шаардын кире бериш жолдорун бомбалап жатканы айтылды.
Эске салсак, кечээ Сириянын бийлиги өлкөнүн түштүгүндөгү Эс-Сувейда шаарына аскерлерин киргизген. Бул шаарда өткөн жуманын аягында друздар коомчулугу менен бедуин урууларынын ортосунда кагылышуулар башталган.
Сириядагы адам укуктары боюнча байкоочу кеңештин маалыматына ылайык, 13-июлдун таңынан бери болгон куралдуу кагылышууларда 102 адам каза болгон. Ондогон адамдар жаракат алган, алардын арасында балдар да бар.
Шаарда коменданттык саат киргизилди. Сириянын Коргоо министрлиги Эс-Сувейдадагы атышууларды токтотуу чечими кабыл алынганын жарыялады. Министр Мурхаф Абу Касра шаардын «белгилүү жана жогорку даражадагы адамдары» менен макулдашууга жетишкенин билдирди.
Чет элдик басылмалардын маалыматына караганда, бул друздар басымдуулук кылган Сувейда провинциясында катталган биринчи дин аралык кагылышуу. Друздар – Ливанда, Иорданияда жана Израилде да жашаган диний секта. Сирияда жарандык согушка чейин болжол менен 700 миңдей друз жашап келген, алардын басымдуу бөлүгү Сувейда провинциясында жайгашкан.
