ЖКда депутат Туратбек Мадылбековдун уулу Эльдар Мадылбеков боюнча Жогорку Соттун чечимин УКМК аткарбай жатканы айтылды

Депутат Курманбек Осмонов кесиптеши Туратбек Мадылбековдун уулу Эльдар Мадылбековду үй камагына чыгарууну талап кылды. Айыпталуучунун адвокаты менен укук коргоочулардын кайрылуу катын депутат ЖКнын Конституциялык мыйзамдар, мамлекеттик түзүлүш жана адам укуктары боюнча комитетинин 18-декабрдагы жыйынында тааныштырды. Анын айтымында, Эльдар Мадылбековдун оорулуу экенин аныктаган УКМКнын медициналык бөлүмүнүн чечими бар, ага гепатит С деген диагноз коюлган. "Айыпталуучунун баш коргоо чарасын өзгөртүү тууралуу Жогорку Соттун токтому бар, бирок соттун чечимин УКМК аткарбай жатат" дейт Осмонов. Депутат Эркин Алымбеков да Жогорку Соттун чыгарган чечими аткарылышы керектигин баса белгиледи.

Автор: Автандил Добулбеков