Украина. Пётр Порошенко президенттик шайлоодо жеңишке жеткени жарыяланды

Кечээ, 25-майда өткөн Украинадагы президенттик шайлоодо Пётр Порошенко жеңишке жеткени жарыяланды. Үч экзит-поллдун берген маалыматы боюнча, ал жалпы шайлоочулардын 56 пайыз добушун жыйнаган. Атаандашы Юлия Тимошенко 12 пайыздан ашык добуш топтогон.

Пётр Алексеевич Порошенко – украиналык коомдук жана саясий ишмер, жеке ишкер, миллиардер. Украина Радасынын 7-чакырылышынын элдик депутаты, фракциясыз.

Ал 1965-жылдын 26-сентябрында Украинанын Одесса облусунун Болград шаарында туулган.

1989-жылы Киев мамлекеттик университетиндеги эл аралык мамилелер жана эл аралык укук факультетинин эл аралык экономист адистиги боюнча аяктаган.

1990-1991-жылдары “Республика” аттуу чакан мекемелердин жана жеке ишкерлердин биримдигинин башчысынын орун басары.

1991-1993-жылдары “Украина биржалык үйү" ишканасынын башчысы.

1993-1998-жылдары “Укрпроминвест” украиналык өнөр-инвестициялык концернинин башчысы, “Ленин кузнясы” ишканасынын президенти, “Мрия” банкынын кеңешинин жетекчиси, "Винницк" кондитердик фабрикасынын Байкоочу кеңешинин жетекчиси.

1998-жылы Жогорку Раданын депутаты. Партиясыз эл өкүлү Украинанын социал-демократиялык фракциясына кирген.

2000-жылы аталган фракциядан чыгып, “Солидарность” партиясын жетектеп баштаган.

2001-жылы оппозицияга өтүп, Ющенкону колдоп баштаган. "Аймактар" партиясынын негиздөөчүсү катары белгилүү.

2002-жылы "Биздин Украина" партиясына мүчө болуп кирген.

2005-жылы Украинанын Улуттук коопсуздук кеңешин жетектеп, коррупциялык иштерге байланыштуу кызматтан алынган.

2006-жылы Жогорку Радада Каржы жана банк ишмердүүлүгү боюнча комитетти башкарган.

2007-2012-жылдары Украинанын Улуттук банкынын төрагасы болуп эмгектенген.

2012-жылы Украинанын экономикасын жана соодасын өнүктүрүү министри болуп дайындалган.

Үй-бүлөлүү, 2 уул, 2 кыздын атасы.

Автор: Жамалидин Парманкулов
Фото: Интернеттен алынды