Асылбек Жээнбеков телерадио кызматкерлерин кесиптик майрамы менен куттуктады

Жогорку Кеңештин төрагасы Асылбек Жээнбеков бүгүн, 8-декабрда телерадио кызматкерлерин кесиптик майрамы менен куттуктады. Куттуктоодо булар айтылат:

"Урматтуу телерадио кызматкерлери!

Сиздерди Жогорку Кеңештин атынан кесиптик майрамыңыздар менен чын дилден куттуктайм!

Маалымат өнүгүүнүн орчундуу факторуна айланган азыркы заманда телекөрсөтүү жана радиоуктуруунун өзгөчө орду бар. Сиздер өлкөдө жана дүйнөнүн ар тарабында болуп жаткан маанилүү окуяларды коомчулукка ыкчам жана так жеткирүү милдетин аркалап келесиздер.

Бүгүнкү ааламдашуу доорунда ар кыл өңүттөгү идеялык маалыматтар түрдүү технологиялык ыкманын негизинде жарандардын аң-сезимине таасир этип жатат. Мындай шартта телерадио кызматкерлеринин алдына олуттуу талаптар коюлуп, алардын кесипкөйлүгүнө болгон муктаждык улам жогорулоодо. Туруктуулуктун сакталышына, мамлекеттүүлүктүн бекемделишине да сиздердин салымыңыздар зор. Ар дайым калыстыктан тайбай, Кыргызстандын жаркын келечеги, өлкөнүн өнүгүшү үчүн талыкпай эмгектене беришиңиздерге тилектешмин.

Баарыңыздарга чың ден соолук, бакубат турмуш, чыгармачылык ийгиликтерди каалайм".

Автор: Автандил Добулбеков