"Өлүп калбаймынбы" деп чак-чалекейге түшпөгүлө". Бул тууралуу бүгүнкү брифингде Саламаттыкты сактоо министрлигинин коомдук саламаттыкты сактоо башкармалыгынын жетекчиси Айнура Акматова пневмония тууралуу кенен маалымат берип жатып билдирди.
"Бүгүнкү күнгө дейре пневмония боюнча көп суроолор түшүп жатат. Статистика жүргүзүлүүдө. Март айынан бери 3 миң 695 адам пневмония илдетине кабылган, анын ичинен 268 киши каза болгон, ал эми 1 миң 907 бейтап айыгып, үйлөрүнө чыгарылган.
Пневмония же өпкөнүн сезгениши - бул өпкөгө инфекция киргенинен улам келип чыккан оору. Өпкө суюктукка же ириңге толуп, какырык менен коштолгон жөтөлдү, чанда кан кусууну, дене табынын көтөрүлүшүн, чыйрыгууну, дем алуунун кысылуусун козгойт. Пневмонияны түрдүү микроорганизмдер жаратат. Бул бактериялар же вирустар болушу мүмкүн. Бул оору балдарга, 60 жаштан улуу кары-картаңдарга, иммунитети алсыз болгон жана жүрөгү оорулуу адамдарга кооптуу.
Эң көп жайылган түрү бул - аба аркылуу жугушу. Бактериялар же вирустар өпкөгө кирген соң, негизинен адамдын иммунитети аны басып өлтүрүшү керек, микроорганизмдердин андан ары жугузуусун токтотот. Бирок бул микроорганизмдердин адамдын иммунитетин тоготпой коюуга жөндөмү бар, адамдын ден соолугу жакшы болсо да ал бактериялар же вирустар өлбөшү мүмкүн. Ошондуктан да өнөкөт оорусу барлар пневмонияны оор көтөрүп жатышат.
Пневмониянын дагы бир белгилери бул - көкүрөктө, далыда оорунун пайда болушу. Кандагы кычкылтектин көрсөткүчү да маанилүү, ал 93 пайыздан кем болбошу шарт. Жеңил жана орто пневмонияны ооруканага караганда, үйдө дарыгердин көзөмөлүндө дарылоо жакшы. Эң башкысы - бейтаптын абалын карап туруу жана ооруканага кайрылуу керек болгон учурду өткөрүп жибербөө кажет. Бейтап энтигип, тез-тез дем ала баштаса, кооптонуу керек. Бирок дүрбөлөңгө түшпөгүлө, бул өтө маанилүү. Адам чак-чалекейге түшкөндө "өлүп калбаймынбы" деп коркуу менен адамдын деми ого бетер кысыла баштайт.
Пневмония болуп калган учурда антибиотиктерди бир гана дарыгердин жазып бергени боюнча кабыл алуу керек. Химиялык аралаштырмалар менен ойнобогула. Дене табы 37 же 38 градустан көтөрүлгөн учурда парацетамол жана аспириндин төрттөн бир бөлүгүн күнүнө 3-4 жолу кабыл алууга болот. Анан акыркы күндөрү көп айтылып жаткан дексаметазонго токтоло кетсем. Бул башка дарылардын таасири тийбей калган учурда дайындала турган гормоналдык препарат. Ал заматта иммундук системди түшүрүүгө алып келет. Абалды ого бетер курчутуп жибериши ыктымал.
Пневмония болбоо үчүн бат-баттан колду жууп туруу, антисептикалык каражаттарды колдонуу, спорт менен машыгуу, белокко жана витаминге бай азыктар менен тамактануу керек. Макарон жана башка ун азыктарынан турган тамактан баш тарткан оң. Өнөкөт ооруларды убагында дарылоо зарыл. Өпкө үчүн дем алууга багытталган гимнастика да пайдалуу.
Коронавирустук инфекцияны жуктуруп алган учурда адегенде адамдын дене табы жогорулап, тамагы кычышып, кургак жөтөлүп, андан кийин даам жана жыт сезүү жоголуп, баш ооруп, жүрөгү айланып, алы кете баштаган белгилери болот. Оору курчуган учурда жүрөктүн согуусу тездеп, кусуп, тердеп, дем кысылып баштайт. Мындайда 118 же 103 номуруна "Тез жардам" кызматына чалуу керек. Ооруканага жатууга аракет жасоо зарыл", - деди Айнура Акматова.
Саламаттыкты сактоо министрлигинин өкүлүнүн айтымында, министрлик тарабынан пневмония менен ооруп жаткандарга 2 миң 258 орун даярдалган, анын ичинен 2098 оруну ээленген. Азыркы тапка карата пневмониядан жабыркаган бейтаптар үчүн 201 бош орун бар.
